19. augustil oll` Miku Ode 100. surma-aastagapäiv ja aastaga algusõh oll` 160. sünnüaastagapäiv. MTÜ Helbi külaseltsi iistvidämisel panti 18. lõikuskuu pääväl Helbi küla keskpaigah, koh oll` Ode elopaik pääle mehele tulõkit 35 aastakka, mälehtüskivi ja tetti tenokumardus ütele suurõmbalõ Seto leelonaasele.

Ode värsiperändusõ maht om ilmotsalda suur ja om kogomahult Vabarna Anne järgi auvääritsel tõsõl kotusõl. Hagu Pauli kirjapantu perrä om Ode perändüse suurus kogoni 3. kotusõl kogo läänemeresoomõ piirkonnah. Ja elosaatuski rasõhõbast rassõmb – nii rassõ, ku viil mõtõlda mõistat ja vaivalt kanda jovvat. A leelo oll`tuu, mia Odet avit ja ello jätt`. Seto leelo oll`kirotõt sisse timä veregruppi ja imäpiimäga üteh ant.

Mitmit kõrdi pääle Ode surma tetti häätegevusürituisi timä mälehtüse jäädvustamisõs, a kunagi es saia vajalikku summat kokko. Petsere liina oll` esiki plaan 1930. aastagal ausammas Odelõ panda, a jäi tegemäldä. No nüüd sis 100 aastaga peräst sai võlga veidükene vähendet.

Mälehtüskivi pühits ja hingepalvusõ pidi Luhamaa ja Miikse kerigu preestri esä Heridon.

Kivi avamisõ iist saisi` hüä nii mõnõki eräannõtaja` ja kivi panti püstü 100% eräkapitali toel. Mälehtüskivi avamisõl kõnõli Linnamäe Helena, kiä oll` uurnu põhàlikult Miku Ode ello, loomingut ja rassõt elosaatust. Hää sõnaga toet ülemtsootska Uibolehe Urmo ning Setomaa vallavaltsuse kommunikatsioonijuht ja Uusvada kultuurikülä vedosnik Järvelilli Rein. Kohal oll` ka Miku Ode sugupuu 4. põlvõ järeltulõja Variku Ilme, kiä umma esiimmä hää sõnaga suguvõsa perimusõ perrä meenut.

MTÜ Helbi küläselts tennäs kõiki annetajit: Vahesaarõ Vollit, Linnamäe Taavit, Sarvõ Õiet. Külaselts tennäs kõiki, kiä nõu ja jõuga kivi avamisõle üten aviti: Talupoja Meelist, Toomiku Vallit, Svetat ja Pavelit, Smarodini Martinit, Varese Arnot, Lobjaka Laurit. Tenokumardus teele, leelonaasekõsõ iinotsan Ahvena Maarikaga, kiä ti Ode laulõ ja ka tõisi leelolaulõ üle Helbi külä lakja lasiti ja ilosat päivä viil ilosambas teiti.

MTÜ Helbi Külaselts tennäs kõiki noid 100 vai rohkõmbatki kohalõtulõjat, kiä mälehtuskivi avamisõle tulõkit pal`los es pia vai tulli kohalõ ka järgmitsõl pääväl, õt arvu saia, määne om sjoo Petsere liina lähküne paik, sjoo Setomaa uhtorgõ pääline tasatsõ maa pääline kotus, kos edevanõmba omma elänü, latsi kasvatanu ja pal`lo tüüd tennü. Kost hummogu võeti piimämannergu` kannipuuga sälgä ja rühiti 4 km Petsere liina turu poolõ. Pühiaigu ja pühäpäivil minti Taeluva kerigu ja kalmuaia poolõ, kohe jääs astmisõs 2,5 km, õt hingele rahu saia ja edevanõmbit mälehtä.

Aiteh kõigilõ!

 

Autor: Küläseldsi nimel RIVESE HELEN, LINNAMÄE HELENA
Viimati muudetud: 29/08/2024 08:50:56